Twarske dźěła za nowu Chróšćansku pěstowarnju derje postupuja

Chrósćicy (AK/SN). Wot junija nastawa nowa pěstowarnja „Chróšćan kołć“ w nošerstwje Serbskeho šulskeho towarstwa. Twarske dźěła derje postupuja. „Ležimy w časowym kaž tež w pjenježnym planje“, podšmórnje wjesnjanosta Marko Kli­man (CDU). Wšitke murje steja, na třěše připrawjeja izolaciju, dźěl woknow je za­twarjeny, srjedź měsaca ma zběhanka być.

Dźěćace dnjowe přebywanišćo, pla­nowane wot architekta Marka Dźisławka z Dobrošic, nastawa w formje pčolaceho kołća. „Přez tule organisku strukturu mamy wjele kulojtych městnow, štož bě předewšěm za mulerjow wužadanje“, Marko Kliman rozłožuje, „ale wuslědk móže so widźeć dać.“ Za Chróšćansku gmejnsku radu ma nowotwar pěstowarnje tuchwilu najwjetšu prioritu. 22. oktobra su nadawki za suchotwar, blidarske a molowanske dźěła kaž tež špundowanje a kachlicy rozdawali, z čimž su najwažniše wupisanja zmištrowane.