Wobchodnicy smědźa do hód jeničce 4. adwent předawać – to ma so změnić
Budyšin (CK/SN). W dohodownym času w Budyšinje njedźelu nakupować je jeničce 4. adwent móžno. Tohodla wikowarjo nětko znowa spytaja tole změnić. Šef Centera na Žitnych wikach Christian Palkow wopodstatnja to z tym, zo móža w susodnych městach štyri razy njedźelu w běhu lěta nakupować, z toho dwójce w adwenće. Kaž wón na zašłym posedźenju Budyskich měšćanskich radźićelow rozłoži, steja Budyscy wikowarjo we wubědźowanju z Drježdźanami a z internetom. Nimo toho so tež města w regionje wo kupcow wubědźuja. „Jenož jenička wočinjena njedźela w adwenće je njelěpšina“, rjekny Christian Palkow. Wón so nadźija, zo hodźi so w tym nastupanju za adwent 2015 hišće něšto změnić.