Budyšin/Drježdźany (SN/MiR/MWj). Něhdźe dwaceći Budyskich serbskich a němskich dźěći z wosom swójbow zetka so wčera na Měrćina-spěwanje zhromadnje ze swojimi maćerjemi a nanami. Woni podachu so do tak mjenowaneje štwórće Budyskich wilow. Tam pobychu na 13 stacijach. Wosebje rady zanjesechu staršim Serbam, kotřiž tam bydla, wšelke Měrćinowe štučki. Wot Naměsta Friedricha Engelsa podachu so na Pfaffowu, Pau­lijowu, Liebknechtowu a Stieberowu hasu. Něšto­ wjace hač dwě hodźinje běchu po puću,­ prjedy hač sej pola Budarjec na Paulijowej darjene słódkosće kaž tež sad słodźeć dachu.

Drježdźanske towarstwo Stup dale bě wospjet na Měrćina-spěwanje přepro­syło. Nimale třiceći dźěći, telko kaž hišće ženje, je na štyrjoch blakach w Drjež­dźanach-Nowym měsće serbske spěwčki zanošowało­. Zhromadnje ze swojimi staršimi zetkachu so na kóncu pola Wokec swójby njedaloko Drježdźanskeje hole­. Při lěhwowym wohenju mějachu wšitcy składnosć, so při ćopłej poliwce a při horcym punšu wočerstwić.