W Budyšinje su nowu techniku kupili a składy su ze selu a dalšimi srědkami derje pjelnjene. Při wšěm so město nadźija, zo sněh a lód hišće tróšku na so čakać datej.

Budyšin (CK/SN). Zyma móže přińć, znajmjeńša po wuprajenjach Marcela Mahlinga, wot 1. januara 2016 zasadźenski nawoda Budyskeje wobdźělenskeje a zawodoweje towaršnosće (BBB) a hižo nětko za organizaciju zymskeje słužby zamołwity. Kaž wón twarski wuběrk měšćanskeje rady tele dny informowaše, maja 210 tonow sele, 50 tonow magneziumchloridoweje kapaliny, a 175 tonow šplita na składźe. Po potrjebje móhli składy wudospołnjeć. Nimo toho su na dohromady 3 500 metrach podłu pućow sněhowe płoty nastajili. Dale napjelnichu w měsće 130 sudobjow při dróhach ze šplitom. Tež wobydlerjo móža sej pola BBB darmotnje šplit k sypanju na chódniki wotewzać.