Rakecy (SN/MWj). Nowe twarnišćo změja wot přichodneho tydźenja w Rakecach resp. na kromje wsy. Z Budyskeho směra widźane ćeče na lěwym boku zwjazkoweje dróhi B 96 Čornica. Jeje tak mjenowane Nižowješćanske spušćadło přichodne dny spotorhaja. Na jeho městnje natwarja skłoninu, po kotrejž so ryby do dalšeho dźěla rěki dóstawaja. Tole zdźěla sakski krajny zarjad spušćadłow w nowinskim wozjewjenju. W nim mjez druhim rěka, zo z přetwarom spušćadła strašne městno za Čornicu wotstronja. „Tele twarske dźěła su dźěl škitneho koncepta přećiwo wulkej wodźe Čornicy“, rozłožuje jednaćel sakskeho krajneho zarjada­ spušćadłow Heinz Gräfe. Přetož po sylnych dešćach je so woda rěki při spušćadle kopiła a k wulkim powodźenjam w Rakecach wjedła.