Naležnosće wobydlerjow přichodnje w Malešecach sobu wobstaraja
Wulka Dubrawa (CK/SN). Wutworjenju zhromadneho stawnistwoweho wobwoda z Malešanskej gmejnu 1. januara 2016 je Wulkodubrawska gmejnska rada na swojim zašłym posedźenju z wjetšinu přihłosowała. Pozadk je, zo maja we Wulkej Dubrawje jenož jeničku stawnicu. Dokelž jedna so wo winowatostny nadawk, dyrbi so komuna wo zastupnistwo starać. Tři lěta su to z Malešec sobu wobstarowali. Tamniše stawnicy pak k tomu hižo zwólniwe njejsu. A dokelž jedna so wo gmejnu přesahowace zastupnistwo, jim tónle nadawk tež přikazać njemóža, praji Malešanski wjesnjanosta Matthias Seidel (CDU). Zo móhli zastupnistwo zaručić, bychu we Wulkej Dubrawje někoho z kwalifikaciju za stawnistwo přistajić dyrbjeli. Po wuprajenju Wulkodubrawskeho wjesnjanosty Lutza Mörby (njestronjan) ze zarjadnistwa dźě nichtó zwólniwy njeje so za to dale kubłać.