Ralbicy-Róžant poskići wokrjesej pjeć móžnosćow, ćěkancow zaměstnić
Róžant (aha/SN). Na oktoberskim posedźenju běchu radźićeljo gmejny Ralbicy-Róžant wo tym wuradźowali, zaměstnić 43 požadarjow azyla, a rozsudźichu so w gmejnskej nowinje wobydlerjow wo podpěru prosyć. Wjesnjanosta Hubertus Ryćer (CDU) w nowinje tež wopodstatni, čehodla měli wobydlerjo kwartěry přizjewić. Nimo toho skedźbni wón na to, zo su čestnohamtscy podpěraćeljo za wothladanje a pomoc azyl pytacym trěbni. Spočatk nowembra je so Ryćer dale na wšě wjesne rady wobroćił z próstwu, zo bychu so za móžnosćemi zaměstnjenja rozhladowali.