Na wutornym posedźenju Slepjanskeje gmejnskeje rady su so z financami za lěto 2016 zaběrali. Dalšej temje běchu wopłóčki a wutwar šěrokopasmoweho zastaranja z internetom.
Slepo (AK/SN). Gmejna Slepo steji před ćežkim nowym hospodarskim lětom. „Smy wšitke wobłuki na zlutniwe wobchadźenje nastajili. Jeno z trěbnej disciplinu lěto 2016 zmištrujemy“, podšmórny komornica Carmen Petrick zawčerawšim na posedźenju rady. Najwješu prioritu maja wopłóčki a wutwar šěrokopasmoweho interneta. Jadrowa wjes Slepo ma so centralnej wopłóčkowej syći přizamknyć. Nimo toho ma gmejna za wažne, wobydlerjow a firmy ze „spěšnym internetom“ zastarać.