Kamjenc (SN). Wo 24 nowych knihow rozrostł je wobłuk Kamjenskeje měšćanskeje biblioteki, w kotrymž poskićeja knihi a dalše medije za nawuknjenje němčiny jako cuzeje rěče. Nimo toho nakupichu minjene tydźenje tójšto dalšich medijow. Z nimi chcedźa ludźom pomhać, kotřiž su z druhich krajow sem přišli a dyrbja němsku rěč hakle nawuknyć. Někotři požadarjo azyla tónle poskitk mjeztym hižo wužiwaja a sej wobrazowe słowniki, podłožki za wuknjenske kursy słuchanske CDje wupožčeja.
Přiběrajcy pak zajimuja so za tajke materialije tež dobrowólni pomocnicy, kotřiž migrantam němčinu podawaja. Z jasnje strukturowanymi a ilustrowanymi zwučowanskimi knihami woni započatkarjam prěnje kroki posrědkuja. Wobsahowje zaběraja so knihi ze situacijemi wšědneho žiwjenja, rozłožeja wopřijeća a tworja jednotliwe dźěle sadow. Nimo wosebiteho rěčneho testa za připućowanych, gramatiki we wobrazach a wokabloweho trenarja hodźi so tež tójšto dźěćacych knihow a filmow za přiswojenje rěče.