Škotowe turněry najwšelakorišeho razu so na mnohich městnach wotměwaja. Najwobstajnišo pak zetkawaja so serbscy wuměnkarjo ke kartyplacanju. Wčera zakónčichu woni swoju lětušu seriju w Hórčanskim Młynkec hosćencu.

Hórki (aha/SN). Před 21 lětami bě Chróšćan Jan Macka, tehdyši sobudźěłaćer Křesćansko-socialneho kubłanskeho skutka (CSB) mysličku zrodźił, organizować škot seniorow ze serbskimi kartyplacarjemi. Wčera woni swój lětuši měsačnje derje přihotowany rjad turněrow zakónčichu.­ Pod nawodom Jana Macki a z podpěru aktiwnych škotowarjow Jurja­ Hanta, Siegfrieda Rawy a Alojsa Langi přewjedźechu dwanaće škotowych wubědźowanjow we wotměnje w hosćencach w Lejnje, Kozarcach, Worklecach, Chrósćicach a druhdźe.