Wotwodźowanje a rjedźenje wopłóčkow staratej so tuchwilu wo wulku haru mjez městom Kulowom a Łazowskej gmejnu. Nětko drje zetkatej so wobě komunje před sudnistwom.

Kulow (AK/SN). Před Drježdźanskim zarjadniskim sudnistwom chce město ­Kulow přećiwo Łazowskej gmejnje skoržić. Tole je měšćanska rada wčera jednohłósnje wobzamknyła. Gmejna bě ­10. nowembra 2014 zrěčenje wo wotwodźowanju wopłóčkow, kotrež wot lěta 1998 płaćeše, k 30. junijej 2015 wupowědźiła. Z tym město scyła přezjedne njeje. „Z našeho wida njehodźi so časowje njewobmjezowane zrěčenje z dobu šěsć měsacow wupowědźić“, měšćanosta Markus Posch (CDU) podšmórny, „smy tuž wupowědźenju najprjedy raz znapřećiwili.“