Pančicy-Kukow (SN/MWj). Na list wjesnjanosty gmejny Pančicy-Kukow woby­dlerjam komuny z próstwu, móžne by­dlenja abo ležownosće, kotrež bychu so za ćěkancow hodźeli, su mjeztym prěnje reakcije dóšli. Kaž Markus Kreuz (CDU) wčera na posedźenju gmejnskeje rady zjawnje zdźěli, je Lötschec swójba zwólniwa, za tónle zaměr swój statok w Žuricach přewostajić. Sami Lötschecy w Žuricach hižo njebydla, bychu pak swojej dwě bydleni wokrjesej přewostajili, zo móhli tam ćěkancy bydlić. „Swójba je samo skicy a wopisanja připołožiła a tuž wuběrnje přidźěłała“, praji Kreuz. Jeho wšak zaběra mjeztym prašenje, štó so potom wo migrantow stara. „Njemóžemy jim jenož bydlenje dać a jich potom sebi samym přewostajić.“ Runočasnje wjesnjanosta přilubi, přewjesć wobydlersku zhromadźiznu w Žuricach, jeli sej to wobydlerjo přeja.