Gmejny Budyskeho wokrjesa na zymsku słužbu derje přihotowane

Njebjelčicy/Róžant/Radwor/Bukecy (SN/JK). Temperatury su w minjenymaj dnjomaj spadnyli. Tak poněčim začuwamy, što zyma je. Nětko w adwentnym času by sněh wězo k hišće lěpšej naledźe přinošował. Sněh a zymu nastupajo su wosebje gmejny z wjesnymi strukturami na to pokazane, być kóždy čas přihotowani zaručić wěstotu a wobchad na swojich wsach.

W Njebjelčicach dowěrjeja hižo wjacore lěta zymsku słužbu na dróhach Wätzigec firmje ze Serbskich Pazlic. Spušćomnje su tam dotal wšitke nadawki zymskeje słužby wukonjeli a su tež na přichodnu derje přihotowani. „Dyrbjało-li so nadměru sněhować, mamy zrěčenje z firmu Missale, kotraž w ekstremnych padach zapřimnje“, potwjerdźa wjesnjanosta Tomaš Čornak(CDU) hotowosć gmejny, zymu witać. Wón je ze słužbu Wätzigec muži spokojom a nadźija so miłeje zymy, zo njeby přejara do kóštow šła. Nalutowane pjenjezy z minjeneju zymow gmejnje pomhaja, dalše gmejnske nadawki zmištrować.