Radźićeljo změnje nošerstwa dweju pućow přihłosowali
Pančicy-Kukow (SN/MWj). Po wšěm zdaću klětu a za dwě lěće su w PančicachKukowje wobšěrniše dróhotwarske dźěła předwidźane, kotrež chce Sakska jako twarski nošer statneje dróhi S 100 zwoprawdźić. Takrjec prěnje přihotowanske dźěła za to mějachu tamniši gmejnscy radźićeljo na swojim zašłym posedźenju na blidźe. Woni přihłosowachu změnje twarskeho nošerja za pódlanskej pućej. Tak ma so puć na wuchodnej kromje wsy wot hłowneje dróhi nimo Zmohow hač ke Kukowskemu pomnikej z wokrjesnej dróhu stać, za to přeńdźe wuski Róžeńčanski puć, wijacy so přez Kukow, do zamołwitosće gmejny. Perspektiwisce je předwidźane, tónle puć jako jednosměrowy do směra na Kukow wupisać. Kaž rěka, pak budu jón kolesowarjo do wobeju směrow wužiwać móc.