Njebjelčicy (HS/SN). Klětuši 15. Krabatowy swjedźeń w Kulowje tam hižo nětko z połnej paru přihotuja. Tuchwilny staw planowanja je sobudźěłaćerka Kulowskeho měšćanskeho zarjadnistwa Beate Hufnagel na zašłym posedźenju Njebjelčanskeje gmejnskeje rady předstajiła. ­Po jeje słowach budźe wšón Kulow wot 12. do 14. awgusta wulke swjedźenišćo. Po serbskej Božej mši we wosadnej cykwi chcedźa swjedźeń na torhošću oficialnje zahajić. Tam witaja potom Krabata, ­Čorneho młynka a hosći z partnerskich městow kaž tež z chorwatskeho Žumberakskeho regiona, hdźež bě so Krabat ­narodźił. Wječor steji pod wjele lubjacym hesłom ­„Zakuzłany Kulow“. Wobchody budu ­dlěje wočinjene, na hasach zaklinči hudźba, a tam pokazaja tež modowe přehladki.