Po wšej Němskej chcychu sobotu hoberski rjećaz swětła z Mnichowa do Berlina tworić, zo bychu tak swoju žadosć za měrom zwuraznili. Tež w Budyšinje běchu k tomu namołwili.
Budyšin (CS/SN). Pjeć dnjow do hód znamjo za měr pokazać bě wotmysł akcije, ke kotrejž běchu sobotu w Budyšinje namołwjeli. Tu podpěrachu cyłoněmsku akciju, kotraž organizowaše wulki rjećaz swětła z bayerskeje do němskeje stolicy. Měješe to reakcija być na atentaty w Parisu, na bědu ćěkancow, na wójnu w Syriskej kaž tež na teror a namóc po wšěm swěće. Ze swěčkami na mnohich městnach Němskeje měješe žadosć za měrom wočiwidna być. Byrnjež dohromady mjenje ludźi hač wočakowane měrowu akciju podpěrało, hódnoćachu ju na jednotliwych městnach přiwšěm jako poradźenu.