Lěkarjo a apotekarjo skorža: Chorobne kasy chcedźa lutować
Pančicy-Kukow/Njeswačidło (SN/mwe). W swojim wozjewjenju, reporće lěkowanskich srědkow 2015, chorobna kasa Barmer domjacym lěkarjam w Sakskej wumjetuje, zo su při wustajenju wšelakich receptow miliony eurow brojili. To rěka, zo su pacientam předrohe město skutkownišich a po rabatach přihódnišich medikamentow napisali.
Tele wumjetowanje je mnohim pacientam kaž dyr mjezwoči. Tež našemu wječornikej woni na naprašowanje prajachu, zo jim na přikład wosebje krjepki, kotrež dyrbja sej wšědnje do woči kapać, často njedosahaja. „Stejiš kaž hłupak před apotekarjom, zo by ći krjepki dał, kotrež ći po recepće njedosahaja“, praji na zelene mjadro (grüner Star) schorjeny.