Smjerdźaca (jh/SN). Stajnje prěnju sobotu lěta přeprošataj sej Hinc Fryča z Hórkow a Jan Šołta z Drježdźan, wotnarjej ­lěsow na arealomaj hońtwjerskeju drustwow Róžant a Pěskecy, wjacorych ­hajnikow kaž tež honjerjow na nowo­lětnu hońtwu. Lětsa zliči Šołta, kiž bě za hońtwu­ zamołwity, při Starym haće pola Smjerdźaceje 18 hajnikow a 36 honjerjow. Po něhdźe hodźinskej hońtwje pod nawodom hłowneju honjerjow Michała Šołty z Drježdźan a Tila Žura z Róžanta wjeselachu so wšitcy nad mnóstwom ­zatřěleneje zwěriny, wšako w lětomaj 2014 a 2015 ani jedne zwěrjo třělili ­njeběchu. Rudolpha Lüninga z Drježdźan počesći Jan Šołta jako krala třělcow, ­dokelž bě wón dańka třělił, Mikławša ­Zahona z Wěteńcy za zatřěleneho dańka-žónku, Tila Žura za třěleneho sornika a Romana Hrjehorja z Kulowa za sornu a sornika.