Dobre dwaceći lět wobsteji mjeztym towarstwo Miłočanska žaba. Tehdy kaž dźensa je jeho zaměr, sylnić zhromadnosć we wsy a starać so wo čiłe kulturne žiwjenje.
Miłoćicy (AK/SN). 29 wot přitomnych 33 wobydlerjow je srjedź decembra 1995 na załoženskej zhromadźiznje towarstwu Miłočanska žaba přistupiło. Tehdy chcychu tych do cyłka zwjazać, kotřiž běchu hač do přewróta we wjesnej Domowinskej skupinje, w Ludowej solidariće, w dźiwadłowej skupinje abo we wohnjowej woborje byli, dopomina so předsyda Marko Kowar. Wot toho časa organizuja kóžde lěto stajenje a mjetanje meje, nalětnje a nazymske rjedźenje při Miłočanskej žabje kaž tež swójbny wulět. W běhu lět su volleyballowy turněr runje tak kaž adwentne spěwanje a rostlinska bursa k tomu přišli. Njelochki čas bě wokoło lěta 2000, jako towarstwo tójšto čłonow zhubi. Tale strata pak je mjeztym wurunana. Hač do dźensnišeho maja konstantnje něhdźe 60 čłonow.
