Wojerecy (UH/SN). Pobrachowace parkowanske městna we Wojerowskim starym měsće a připowědźena analyza, kak chcedźa połoženje polěpšić, bě wčera tema wobydlerskeje zhromadźizny. Něhdźe 40 wobydlerjow je do noweje radnicy přišło. Přičina njespokojaceho stawa su přiběrace zatwarjenje swobodnych městnow kaž tež wuske puće, pochadźace ze załoženskeho časa, jako hišće nichtó na dźensniši rozměr wobchada a na wulkosć awtow myslił njebě.
Kaž Martin Schüffler z Drježdźanskeho inženjerskeho běrowa rozłoži, so předewšěm dopołdnja wobydlerjo, sobudźěłaćerjo wobchodow a wopytowarjo wo samsne parkowanske městna prócuja. Dohromady maja na naměstach a na kromje pućow 830 tajkich městnow, „při čimž je parkowanski dom lutowarnje z 90 darmotnymi městnami woprawdźity luksus. To maja Wojerecy předskok porno tamnym městam, hdźež směš jenož wěsty čas abo z płaćenjom parkować.