Na wjacorych městnach wotměchu so wčera wopominanja woporow nacionalsocializma. Tak kaž we Wojerecach a w Kamjencu zetkachu so wobydlerjo tež w Budyšinje.

Budyšin (CS/SN). Tradicionalnje česća Budyšenjo wopory nacionalsocializma při pomjatnym kamjenju na Neujowej promenadźe blisko zachoda do zawoda Bombardier. Bywša wagonownja bě wotnožka něhdyšeho koncentraciskeho lěhwa Groß Rosen. Jatych běchu tule k dźěłu nućili.