Kapičkowy wječor karnewalistow mału a wulku politiku pošwikał
Njebjelčicy (BW/SN). Lubowarjo póstniskeje zabawy njetrjebaja do Kölna abo Mainza jěć, zo móhli swojej wopicy porjadnje cokor dać. Na kapičkowym wječoru Serbskopazličanskeho karnewaloweho towarstwa sobotu w Njebjelčanskej „Bjesadźe“ znajmjeńša bě telko žorta, zo drje někotremužkuli wopytowarjej brjuch boleše a hrjady so zhibowachu, kaž w lětušim hesle rěka. Runje tak kaž w zašłej maja tež w tuchwilnej 46. sezonje z Matthiasom II. a Hertu I. z Wěteńcy znowa serbski princowski por, kiž swój norski lud tež serbsce powita. A dokelž je móhłrjec z wašnjom, zo tež susodźa princowskeho pora a dalši wjesnjenjo jimaj k česći programowy dypk wuhotuja, podachu so Wěteńčanske a Miłočanske žabki na jězbu po kralestwje Matthiasa a Herty a jeju dźowki Hilžbjety. To skićeše wězo wjele składnosćow, wo pućotwarje runje tak rozmyslować kaž wo chodojtypalenju, wo wjesnjanosće a wo projekće „Njebjesa“, a to wšo tež serbsce.
