Direktor Sakskeje załožby za přirodu a wobswět (LaNU) Bernd Dietmar Kammerschen a Njebjelčanski wjesnjanosta Tomaš Čornak (CDU) staj minjeny pjatk kooperaciske zrěčenje podpisałoj.

Njebjelčicy (HS/SN). Na něhdźe dwaceći lět zapołoženy je loni wot Njebjelčanskeje gmejnskeje rady wobzamknjeny projekt, na teritoriju gmejny podłu Jaworskeje rěčki wo runowahu mjez čłowjekom a přirodu so starać. Někotre prócowanja we wobłuku projekta „Njebjesa“ su tam hižo widźeć. Zakładna mysl je ekokonto gmejny. Z nim móža wurunanske płoniny poskićeć, hdyž na přikład předewzaća kaž ENSO na druhich městnach płoniny wobtwarjeja a zazygluja. Tak su při pućowanskej šćežce z Miłoćic do Serbskich Pazlic sadowcowu łuku z nimale 60 krušwinami, jabłučinami, wišninami a slowčinami zwosadźeli.