Wojerecy (AK/SN). Wojerecy bórze dalšich požadarjow azyla přiwozmu. We wotnožce powołanskošulskeho centruma „Konrad Zuse“ dom 2 na Hasy Liselotty Hermann nastawa w nadawku Budyskeho wokrjesa přebywanišćo za 200 ćěkancow. „Planujemy prěnich ludźi w jědnatym kalendrowym tydźenja srjedź měrca přiwzać“, informuje Gernot Schweitzer, nowinski rěčnik wokrjesa na naprašowanje, „dźěłamy po planje.“

Tuchwilu da wokrjes twarjenje přihotować. Techniske wobłuki kaž tepjenje, wětrjenje a sanitarne kaž tež elektrika su w kónčnej montaži. Hruby twar, kachlicarske a suchotwarske dźěła měli tón tydźeń wotzamknjene być. „Durje su w minjenym tydźenju zatwarili“, Gernot Schweitzer zdźěla. Nimale hotowi su tež kładźerjo špundowanja a molerjo. Pincu chcedźa hač do kónca februara wutwarić. Wšitke dźěła maja 4. měrca zakónčene być.