Róžeńčenjo bórze bjez wobory?

wutora, 23. februara 2016
artikl hódnoćić
(0 )

Róžant (SN/JaW). Tójšto kritiki dyrbjachu sej kameradojo dobrowólneje wohnjoweje wobory Róžant na swojej hłownej zhromadźiznje minjeny pjatk w Róžeńčanskim towarstwowym domje naposkać. Nawoda wobory Frank Pjech mjenowaše předewšěm špatne wobdźělenje na słužbach a dalekubłanjach. Skutkownosć wobory pak je dale zaručena.

W lětnej rozprawje Pjecha rěkaše, zo su kameradojo Róžeńčanskeje wobory přiwšěm derje dźěłali. Tak su loni cyłkownje 1 113 hodźin dźěłali. Trójce běchu zasadźeni, mjez druhim w juniju při wulkej wodźe w Róžeńće. „Tu je wšitko jara derje běžało“, Pjech zwěsći. Wobćežne pak je, zasadźenje wobory wodnjo zawěsćić. Tuchwilu zaručeja to sobudźěłaćerjo Suchec awtoweje zamkarnje, za čož so nawoda wobory dźakowaše. „Na kóždy pad pak dyrbiće na zasadźenje z wohnjowobornym awtom jěć, nic z priwatnymi jězdźidłami. Jenož hdyž woborne jězdźidło wužiwaće, sće tež zawěsćeni!“, wón podšmórny. Dale skedźbni na to, w gratowni na porjad a čistotu dźiwać. Dobry poměr mjez wohnjowej woboru a wjesnjanostu sej wón chwaleše.

wozjewjene w: Lokalka
Prošu přizjewće so, chceće-li komentar podać

nawěšk

nowostki LND