Chce-li wjetša ličba zajimcow swójski nowy dom twarić abo sej wutwarić, swědči to wo dowěrje do přichoda a zo so něhdźe derje čuješ. Hinak njemóžeš sej rozjasnić, zo měješe so Njebjelčanska gmejnska rada z wjacorymi tajkimi naležnosćemi zaběrać.
Njebjelčicy (HS/SN). Runja druhim gmejnam je tež w Njebjelčanskej z wašnjom, zo so tam najprjedy techniski wuběrk z twarskimi próstwami zaběra. Tak móža potom čłonojo gmejnskeje rady na swojim regularnym posedźenju poměrnje spěšnje wo nich rozsudźić. Hač na jedne wuwzaće bě tomu tež na zašłym posedźenju gmejnskeje rady tak.