Worklecy (AR/SN). Lětuše 100. posmjertne narodniny Jurja Brězana běchu jedna z temow na wčerawšim posedźenju Worklečanskeje gmejnskeje rady. Wjesnjanosta Franc Brusk (CDU) přednjese próstwu sobustawow něhdyšeho Smječkečanskeho muskeho chóra. Woni namjetuja składnostnje lětušeho jubileja spisowaćela a basnika we Worklecach jako jeho ródnej wsy stajić pomjatny kamjeń. Radźićeljo ideji přihłosowachu. Dźěl z nich ma nětko nadawk, hač do přichodneje zhromadźizny rozmyslować wo městnosći a wo móžnym napohledźe pomnika.

Radźićel Měrko Šmit wupraji so zwólniwy w septembru přihotować literarny wječork na česć Jurja Brězana. Předstajić chcedźa wurězki z jeho twórbow, w kotrychž su Worklecy a wokolina naspomnjene. K tomu hodźa so pokazać historiske a aktualne fota z wotpowědnymi městnosćemi. Radźićeljo tež tónle namjet přiwzachu.