3 430 zajimcow wopyta kónc tydźenja 19. serbske jutrowne wiki w Slepom. Woni móžachu 33 ludowym wuměłcam ze srjedźneje a Delnjeje Łužicy kaž tež z Budyšina, Berlina a Durinskeje při wóskowanju, bosěrowanju a škrabanju jejkow přihladować a sej je kupić.
Slepo (ML/SN). Dźěći z Brězowskeje pěstowarnje „Baćonjace hnězdo“ witachu sobotu ze serbskimi a němskimi pěsničkami a rejkami prěnich wopytowarjow přehladki jejkadebjerjow na žurli Slepjanskeho Serbskeho kulturneho centruma (SKC). Spěwne ćěleso Rowniske glosy wokřewi sobotu popołdnju hosći ze swojim programom w slepjanšćinje. Přewažnje zanošowachu žony jutrowne kěrluše, kaž „Zbóžne su, kiž něnt we wěrje“. Wčera dopołdnja předstaji Slepjanski dźěćacy a młodźinski ansambl lóštne spěwy swojeje dwurěčneje kónčiny.