Njebjelčicy (HS/SN). Z publikaciju dr. Petera Kroha wo mjeńšinowych prawach su so zajimcy wčera w Njebjelčicach zeznajomili. Přeprosyła je tamniša Domowinska skupina. Přitomni sej spěšnje wuwědomichu, zo bě awtor mnohe nastorki za knihu „Minderheitenrecht ist Menschenrecht“, kotraž hódnoći tež aktualne politiske wuwiće w Europje a na swěće, ze spisow swojeho dźěda Jana Skale dóstał. Poćah k dźensnišemu je wočiwidny a wšelakory. Toho běchu sej awtor a hosćo w diskusiji spěšnje přezjedni. Bianka Čornakec so prašeše, kotru poziciju Kroh nastupajo Serbski sejm jako demokratisce wolene zastupnistwo Serbow zaběra. Peter Kroh, kiž iniciatiwu wot wšeho spočatka podpěruje, skedźbni hnydom na słabosće. Přewjele časa bě skupina brojiła, prjedy hač je konkretne politiske zaměry zwurazniła a so na strony w krajnymaj sejmomaj wobroćiła. Hižo Jan Skala 1929 wobžarowaše, zo mjeńšiny w Němskej swójske parlamentariske zastupnistwo nimaja. Tež nětkole je dosć přičin tajke wutworić, kaž su to wotbagrowanje wsow, wulkosć rjadownjow na serbskich šulach a dalše.