Něhdźe 70 přiwisnikow serbskeje alternatiwneje kultury přichwata minjenu sobotu do Nuknicy na nalětni koncert towarstwa Barakka. Hesło wječora „Heawie rettl“ je žortne skomolenje žanra heavy metal, kotryž měł poprawom na jewišću zaklinčeć. Tola dny do koncerta so situacija dramatisce přiwótřeše – jedna skupina po druhej je chorosće dla wotprajiła, poslednja hakle pjatk popołdnju, jako w Nuknicy hižo swjedźenski stan sta­jachu. Zarjadowanje steješe tuž scyła na hračkach,­ krótkodobnje pak daštej so hišće skupinje nawabić – NBD a Neonada, wobě z Mišna. Wonej drje hraje­štej skerje nadměru twjerdy punk dyžli heavy­ metal, připosłucharjo běchu při­wšěm zahorjeni.

Šmjatańcy ze skupinami dla wšak bě wabjenje ćerpjeło, čehoždla bě swjedźenski stan jenož poł połny. Zarjadowarjo běchu najebać to spokojom. Wšako njeje ličba hosći wažna, ale nalada, kaž zamołwići zwuraznichu. A ta bě po měnjenju připosłucharjow a zarjadowarjow wulkotna. Tak dobra samo, zo na kóncu skupiny, hosćo a čłonojo Barakki na jewišću zhromadnje improwizowachu.