Mjeztym tři lěta je Smjerdźečanska dobrowólna wohnjowa wobora z jězdźidłom wuhotowana. Hakle nětko pak na transporter VW T4 připrawichu, štož na kóžde wohnjowoborne awto słuša.
Smjerdźaca (aha/SN). Při słužbnych zasadźenjach a na wubědźowanjach Smjerdźečanscy wohnjowi wobornicy swoje awto hižo parować nochcedźa. Loni 13. junija pak zwěsćichu bytostny njedostatk, jako buchu při wulkim njewjedrje alarmowani, zo bychu na dróhu spowalene štomy mjez Smjerdźacej a Kamjencom rumowali.
Tehdy zasadźeni wobornicy najprjedy dróhu z wobeju stronow z wobchadnymi pylonami zaraćichu, zo njeby wobchad dźěło wobornikow wohrozył. Nadobo pak přijědźe z Kamjenskeho směra awto. Jeho wodźer pylony ignorowaše a wokoło nich jědźeše. Na zbožo so ničo stało njeje. Wopodstatnjenje šofera za tajke jednanje bě woprawnjene: Wón je ze swojeje strony drje widźał wjerćitu warnowacu žołtu swěcu, njemóžeše pak widźeć módru swěcu, pokazowacu na wohnjowoborne zasadźenje. Dokelž muž měnješe, zo běše k njezbožu dóšło, chcyše wón dale jěć, zo by swoju pomoc poskićił.
