Dyrbja dalše dawki wróćić

štwórtk, 06. oktobera 2016
artikl hódnoćić
(0 )

Žadanja energijoweho koncerna načinjeja Trjebinej wulke starosće

Trjebin (AK/SN). Hospodarske połoženje gmejny Trjebin je přewšo napjate. Tole podšmórny wjesnjanostka Kerstin An­tonius (Trjebinske wolerske zjednoćenstwo) na wčerawšim posedźenju gmejnskeje rady. „Tajke połoženje kaž tuchwilu hišće ženje njemějachmy“, wona rjekny. Gmejna dyrbi nětko dalše přemysłowe dawki Vattenfallej wróćić. Tónraz su to dawki z lěta 2010 inkluziwnje šěsć procentow danje. Trjebinska gmejna dyrbi za lěta wot 2002 hač do 2010 dohromady 1,1 milion eurow energijowemu kon­cernej wróćić. Žadanja koncerna za lěta 2011 do 2013 njejsu hišće wobličene. Za gmejnski hospodarski plan woznamjenja žadanje za 2010 dalše hoberske poćeženje. „Njewěmy hišće, kak mamy tule sumu zapłaćić“, rjekny wjesnjanostka. Zo ma gmejna Vattenfallej přemysłowy dawk wróćić, komunu runje tak poćežuje kaž tak mjenowany dawk bohatych, kotryž sej Swobodny stat Sakska wot pozdatnje bohatych gmejnow žada. Kaž Kerstin Antonius wčera wuzbě­hny, pak tele bohužel hišće hač ke krajnemu knježerstwu w Drježdźanach dóšło njeje.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

fueorg misain karten sorbisch

nowostki LND