Znapřećiwjenja nastupajo wjetšu kormjernju swini rozjimali
Kamjenc (SN/MWj). Nastupajo wotpohladane powjetšenje Ralbičanskeje kormjernje swini bě wčera jedyn z rozsudnych terminow. W Kamjenskej wotnožce krajnoradneho zarjada rozjimachu spřećiwjenja přećiwo twarskim planam. Mjeztym zo bě Gröbnerec ratarska firma z Döbelna jako wobsedźer kormjernje z prawiznikomaj, wěcywustojnymi fachowcami a dalšimi wosobinami zastupjena, bě ličba znapřećiwjerjow skerje skromna, byrnjež dohromady nimale 200 spřećiwjenjow dóšło, kaž nawoda wobswětoweho wotrjada krajnoradneho zarjada Georg Richter rjekny. Dwě z tychle spřećiwjenjow běštej z nimale 90 mjenami podpisanej.
Ralbičansku kormjernju chce mějićel wot nimale 6 900 na něhdźe 11 000 swini rozšěrić. Za to planuja wjacore stare chlěwy wottorhać, dwaj nowej natwarić, wobstejace modernizować a dotalnej wotewrjenej zběrnikaj za hnójnicu z nowymaj zawrjenymaj zběrnikomaj narunać.