Konjecy (aha/SN). Hóstna stwa Konječanskeho towarstwoweho domu bě wobsadźena, jako witaše tam nawoda wohnjoweje wobory Šunow-Konjecy, wyši hašenski mišter Silvio Čórlich, minjeny pjatk kameradow na lětnu hłownu zhromadźiznu. Zhladujo na minjene lěto, jako swjećeše wobora 75. róčnicu załoženja, naliči Čórlich aktiwity wobornikow, wukonjane w dohromady 1 380 słužbnych hodźinach. Cyłkownje ma tamniša wobora 34 čłonow w přerěznej starobje 37 lět. 26 z nich wukonja aktiwnu słužbu, mjez nimi jedna žona.
Šěsć razow su kameradow delanskeje wobory loni alarmowali, z toho trójce k hašenju wohenja. Wulke wužadanje bě zasadźenje po njewjedrje 26. junija, jako bě pomoc wobornikow jara prašana. Nimo toho dyrbjachu Klóštersku wodu na kritiskich městnach w Konjecach a Šunowje kontrolować. K wjace hač sto zasadźenskim hodźinam dóńdźe nimo toho přez wobchadne njezbožo z dwěmaj zranjenymaj kónc nowembra. Dale skedźbni rozprawjer na dalekubłanja a zwučowanja kaž tež na hladanje techniki a wohnjowoborneho gratu.