Ralbicy (aha/SN). Móhłrjec přez nóc je so napohlad na južnej kromje Ralbic změnił. Tam staj so Klaus Debik a jeho mandźelska Marja rozsudźiłoj, swój statok přewostajić młódšim ludźom a sej natwarić swojim potrjebam wotpowědny mjeńši dom.
Internetnje so Debikec mandźelskaj wobhoništaj, kak móhłoj swoje předstawy zwoprawdźić a sej masiwny dom z drjewa natwarić. Tak zeznaštaj Kulowskeho ćěsliskeho a třěchikryjerskeho mištra Milana Šefera a jeho zawod KOMPLETNA TŘĚCHA. Wosebje lubjachu so jimaj wšelake wutwarjenske schodźenki, z kotrymiž móžeš něštožkuli sam organizować a tak pjenjezy lutować, wšako so swójske dźěło cyłkownemu kapitalej přiliči. Po tym zo bě inženjerski běrow za twarstwo Stanisława Statnika projekt zdźěłał a twarska dowolnosć předležeše, su sobudźěłaćerjo Milana Šefera krótko do jutrow z hrubym twarom započeli, wužiwajo drjewo larika a šmrěka přewažnje ze sakskich rězakow.