Dlěši čas njeběchu w Sernjanach nałožk stajenja a mjetanja meje hajili, doniž njejsu so před lětomaj někotre tamniše młode serbske swójby wo wozrodźenje starali.
Sernjany (aha/SN). Termin mejemjetanja wučinichu sej na sobotu po Božim spěću. Minjenu sobotu mjeztym třeći raz su wjacore młode maćerje swoje dźěći narodnu drastu zhotowali. Krasny bě to Sernjančanam napohlad, hdyž poda so dźesać porow zaso pod hudźbnym přewodom Měrćina Weclicha na nawjes před hosćencom. Najmłódša w narodnej drasće bě hakle dwulětna Pia Hebestreitec ze swojim wo lěto staršim přewodnikom Lucom Haufu.
Prjedy hač meja padny, předstajichu wšitke pory zhromadnje – tež někotre maćerje běchu so narodnu drastu woblekli – spodobny program z tradicionalnymi rejemi a žnějachu mjez wjesnymi připosłucharjemi wulke připóznaće, jako předstajichu mjez druhim Šewca, Katyržinku a Stup dale. Po tym zo bě 22 metrow wysoki mejski štom padnył, docpě sydomlětny Matej Kober jako prěni jeho wjeršk ze serbskej chorhoju. Za mejsku kralownu wuzwoli sej wón šěsćlětnu Saruh Obstec.