Nowy móst nad Klóšterskej wodu a wutwar statneje dróhi S 100 w Pančicach-Kukowje stej tuchwilu z wotstawkom najwjetše nadróžne twarnišćo w dwurěčnych gmejnach. Z tejle seriju twarnišćo přewodźamy a wobswětlamy starosće tamnišich wobydlerjow.

Wot spočatka tohole tydźenja je na twarnišću w Pančicach-Kukowje zaso wo tójšto měrnišo. Točenja za fundamenty mosta su nimo. Tak su wobydlerjo w bliskosći tež haru zašłych tydźenjow přetrali. Ta bě sčasami ekstremna a tež hišće wjacore sta metrow dale słyšeć. „Haru smy wězo tež słyšeli, ale w kowarni tak a tak z mašinami dźěłamy, kotrež su tohorunja wótře. Tuž njebě to tak zlě. Jenož hdyž su dźěłaćerjo druhdy hač do 20.30 dźěłali, bě to poćežowace. Ale što sej chceš. Jónu wšak je to nimo“, powěda kowarski mišter Dirk Hawš. Hewak jeho zawod wot twarnišća potrjecheny njeje, dokelž so wón ze swojimi jězdźidłami hač ke kowarni dóstawa. To płaći tež za nakładne awta, kotrež jemu material woža.