Plusnikecy (SK/SN). Hač do kónca nowembra ma stejišćo Malešanskeje gmejny k wobłukowemu zawodnemu dojednanju za skału Pro Stein w Plusnikecach předležeć. Štož zda so być zarjadniska naležnosć, njelubych wuskutkow na wokolne wsy dla zjawnosć mjeztym jara zaběra. Tohodla zetkachu so njedawno Malešanski wjesnjanosta Matthias Seidel (CDU) a čłonojo wot apryla skutkowaceje wobydlerskeje iniciatiwy k zhromadnemu wobjednanju problemow, kotrež skałowy zawod wobydlerstwu a krajinje načinja. Přitomnaj běštaj zapósłancaj Sakskeho krajneho sejma Marko Šiman (CDU) a Hajko Kozel (Lěwica). Hłowny problem je dźeń a wjetše nasypnišćo z wotpadkami mlějernje zornowca.
Wospjet bu kritika zwuraznjena, zo su wot zawoda do nadawka date posudki jednostronske. Po słowach gmejnskeho radźićela dr. Jürgena Wenglera wěrjomnosć posudkow data njeje. Tež Malešanska gmejnska rada je so na swojim zašłym posedźenju ze skału zaběrała.
