Hórki (JK/SN). Mało brizancy lubješe dnjowy porjad wčerawšeho posedźenja Chróšćanskeje gmejnskeje rady w Hórkach. Ale štož wjesnjanosta Marko Kliman (CDU) radźićelam we wobłuku swojich informacijow zdźěli, měješe potencial hodowneho dara. Wulce zwjeseleny Kliman informowaše, zo je Sakska natwarna banka (SAB) hišće wustejace spěchowanske srědki 329 000 eurow za nowu Chróšćansku pěstowarnju přizwoliła a na konto gmejny přepokazała. Tak je gmejnska kasa zaso stabilnje pjelnjena, a gmejna njetrjeba kasowy kredit hižo dlěje strapacěrować. Nimo toho móža skónčnje konkretnje wo tym rozmyslować, kak ma z něhdyšej pěstowarnju dale hić. Za „Chróšćan kołć“ su wot lěta 2012 cyłkownje 1,7 milionow eurow zasadźili, z toho 1,3 miliony spěchowanskich srědkow SAB. W tym zwisku wupraji wjesnjanosta Marko Kliman wšitkim, kotřiž běchu so na někajkežkuli wašnje wo spěchowanje a zwoprawdźenje projekta noweje­ pěstowarnje prócowali, swój wosobinski dźak.