Wojerecy/Němcy (AK/SN). W februaru započnu w Němcach statnu dróhu S 95 wutwarjeć, štož ma něhdźe dwě lěće trać. Wojerowska měšćanska rada je na swojim zašłym posedźenju wobzamknyła, zo ma Běłowodźanske předewzaće Strabag tónle nadawk dóstać. Cyłkowna inwesticija wučinja 2,7 milionow eurow. Najwjetši dźěl toho financuje krajny zarjad za dróhotwar a wobchad Sakskeje. Město Wojerecy přida swójski podźěl 191 000 eurow.

Po dołhosći 1,1 kilometra ma so jězdnja wobšěrnje wutwarić, runje tak chódniki, busowe zastanišća a dešćikowy kanal. Po dotwarje ponowja hišće puć, po kotrymž powjedźe za čas twarskich dźěłow wobjězdka. „W februaru započnu so přihotowanske dźěła při Wincencowej hrjebi. Ručež wjedro dowoli, slěduje prěni twarski wotrězk ze směra Kulowca hač k Wincencowej hrjebi“, rozłoži nawoda twarskeho wotrjada města Dietmar Wolf njedawno radźićelam. Po jeho słowach ma S 95 w Němcach hač do kónca lěta 2019 hotowa być. Za wobchad wot Wojerec do Kulowa woznamjenja to wulkomyslne wokołopuće.