Stróža (CS/SN). Wustajeńca z twórbami, nastatymi we wobłuku wubědźowanja „Krabat 2.0“ je wot minjeneho pjatka w Stróžanskim Domje tysac hatow widźeć. Kaž tam na wotewrjenju rjeknychu, bě Krabat poprawom tež ćěkanc, wšako pochadźeše Johann Schadowitz z Chorwatskeje a dósta so hač na sakski kralowski dwór. W lěće 2016 su serbskich a němskich młodostnych kaž tež młodych ćěkancow namołwjeli so z Krabatom wuměłsce rozestajeć a so prašeć, što wón w dźensnišim času wozna- mjenja.
Tak mjenowany projekt „Urban art“ přewjedźechu Domowina, Budyski Kamjentny dom a Debrikečanski dom za młodych ćěkancow zhromadnje. Serbscy, němscy, syriscy, afghaniscy a čěscy młodostni zapodachu dohromady 120 wuměłskich dźěłow. Nimo rysowankow běchu tež kolaže a grafitije zastupjene. W rozdźělnych zestawach pokazachu je w Serbskim domje, Serbskim muzeju a Kamjentnym domje. Štwórta a poslednja wustajeńca k mjenowamu projektej je nětko w Domje tysac hatow widźeć. Nastała je wona z płódneho zhromadneho dźěła, kotrež Domowinu a zarjadnistwo biosferoweho rezerwata Hornjołužiska hola a haty zwjazuje.