Młoda swójba je sej w Zarěču w Njeswačanskej gmejnje žiwjenski són spjelniła, a cyła wjes móže na tym podźěl měć. Tónle přikład móhł tež druhim zajimawy być.
Zarěč (UM/SN). Knježe domy a k tomu słušace kubła běchu něhdy hospodarske žro kóždeje wsy. Někotre zwjetša nahladne twarjenja buchu po 1945 wottorhane, tamne mějachu wjace zboža a so na nowe wašnje wužiwachu. Po politiskim přewróće 1990 započa tójšto knježich domow z procha stawać. Eksemplariske za tele wuwiće je knježi dom w Zarěču. Hač do lěta 1990 jón tehdyša Zarěčanska gmejna hišće intensiwnje wužiwaše, mjez druhim jako kulturny centrum, młodźinski klub a předawanišćo. 1992 da Zarěč w swojim poslednim lěće do zagmejnowanja do Njeswačidła třěchu ponowić. To bě wuměnjenje za to, zo je knježi dom dołhi čas, w kotrymž prózdny steješe, derje přetrał.