Jako jedne z poslednich lětušich wikow jutrownych jejkow wotměchu so minjeny kónc tydźenja te w Nowej Łuce. Nimo jejkadebjenja skedźbnichu tam hišće na dalše tradicije.

Nowa Łuka (SiR/SN). Wiki jutrownych jejkow w Nowej Łuce wuprudźeja kóžde lěto wosebity flair. Zda so, zo wopytowarjo hektiku wšědneho dnja ze swojim płašćom wotpołoža, prjedy hač so na žurli z jeje přijomnej atmosferu rozhladuja. K tomu hodźeše so lětsa hudźbny poskitk ­Židźinskeho chóra na wotewrjenju sobotu dopołdnja.

Mjeztym 27 lět přeprošeja čłonojo regionalneho kulturneho towarstwa pod nawodom Wernera Bejmy stajnje bołmončku na wiki jutrownych jejkow. Na nich běchu znowa debjerjo wšitkich generacijow zastupjeni, kotřiž znate techniki debjenja předstajichu. Prěni raz pódla bě sydomlětna Greta Marleen ze Židźinoho. „Debjenje wobradźa mi prosće wjele wjesela“, wona rjekny, prjedy hač so zaso horcemu wóskej, husacemu pjerku a jeh­ličce wěnowaše a rjany motiw na jejko skuzła.