Budyšin (SN/MiR). Šěre kućiki w sprjewinym měsće Budyšinje maja so zhubić. Wo to stara so nětko tudyša wobydlerska iniciatiwna skupina „měšćanscy wozelenjerjo“ (Die Stadtbegrüner). Aktualna akcija angažowanych Budyšanow je wusměrjena na štomy podłu dróhow. Tam ma so přichodnje wšitko zelenić a pisanić. Za to pyta skupina pomoc. „Zaměr je, podłu měšćanskich dróhow mjez štomami kwětki sadźeć a tak žiwjenske wjeselo přisporjeć“, zdźěla rěčnica iniciatiwy Anke Knaak. Dobre přikłady su na Fichtowej hižo widźeć. Tam wuhladachu nimoducy loni samo róže a smjerdnički (Ringelblume). Na Liebknechtowej běchu zašłe lěta wokoło štomow mjez druhim macoški kćěli. Wšudźe tam, tak tež na Lubijskej, běchu a su zdźěla hižo lětsa wobydlerjo ze swójskeho zajima kwětki sadźeli. „Nimo zlěpšenja klimy dźe nam wo wjeselo při porjeńšenju našeho města“, Anke Knaak wuswětla.