Njebjelčicy (JK/SN). Gmejna Njebjelčicy je jedna z mało sakskich, kotrež maja tak mjenowane eko-konto. Tajke konto komunam zmóžnja, sćěhi a wuskutki zasahnjenja do přirody wurunać. Tajki pad njedawno w gmejnje mějachu.
Telekomunikaciske předewzaće Telefonica Germany bě na teritoriju Bukečanskeje gmejny stajiła sćežor za wusyłanje telefoniskich zwiskow. Poskitk, wužiwanu přestrjeń narunać z tym, zo na druhim městnje štomy nasadźeja, njemóžeše Bukečanska gmejna wužiwać a je poskitk mějićelam ekologiskeho konta dale dała. Njebjelčenjo njewahachu a poskitk přiwzachu.