Starosće ludźi noweho nakupowanišća dla wobkedźbować
Rakecy (JK/SN). Poměrnje krótke bě wčerawše posedźenje Rakečanskeje gmejnskeje rady. Tónraz njestejachu žane wulke wobzamknjenja w srjedźišću. We wobłuku naprašowanja wobydlerjow a radźićelow pak jewjachu so někotre temy, kotrež maja so rozrisać.
Tak je mnohim wjesnjanam hišće njejasne, kak ma so woda po dešću wot nowonastawaceho nakupowanišća na něhdyšim kuble wotwodźeć. Wosebje na planowanym parkowanišću njeje po měnjenju někotrych Rakečanow spóznajomne, dokal woda poběži. Hrozy strach, zo dešćowa woda, změšana z maćiznami, kotrež awta zawostajeja, do bliskeje Młynskeje hrjebje ćeče. Zo tomu tak njeje, znapřećiwi wjesnjanosta Swen Nowotny (CDU) a wobydlerjow změrowa. Po planach, kotrež je tež gmejna sobu rozsudźiła, poběži woda do tak mjenowanych rigolow a z nich do zemje zasaknje. Tež wodu z třěchi kupnicy takle wotwjedu.