Konjecy/Šunow (aha/SN). Hewak w juniju organizowany wjesny swjedźeń při Konječanskim towarstwowym domje stej dobrowólna wohnjowa wobora a blidotenisowe towarstwo lětsa kónc tydźenja přewjedłoj. Tónraz su mjenujcy mejemjetanje w Šunowje a Konjecach do programa zapřijeli.

Prjedy hač meja w Šunowje padny, rejwaše wokoło njeje wosom porow pod akordeonowym přewodom Maćija Šołty z Pančic-Kukowa. Wšitke holcy běchu narodnu drastu zhotowane. Beno Matka bě najspěšniši při wjeršku padnjeneje meje a wuzwoli sej Josephinu Čornakec za kralownu. Na konju sedźo jěchaštaj wonaj na čole dołheho ćaha přihladowarjow do Konjec. Tam bě jich mejski kral na kofej přeprosył. Nimo toho dožiwichu wjesnjenjo a jich hosćo překwapjenku. Kaž stajnje běchu ženjeni mužojo tež w Konjecach nahladnu meju stajili. ­Młodźi starši pak běchu z dźěćimi někotre reje nazwučowali a tež tu běchu holcy w narodnej drasće. Mejski kral mjez dźěćimi bu Hannes Browatzki, jeho kralowna bě Klara Kralec.