Budyšin (CK/SN). Kwota bjezdźěłnych ležeše po wšej Hornjej Łužicy w meji pola 6,7 procentow. Po wuprajenju šefa Budyskeje agentury za dźěło Thomasa Berndta je to najniša ličba, kotruž su w regionje hdy zwěsćili. Wokoło Kamjenca wučinja wona samo jenož 3,7 procentow. Z tak mjenowaneho „tučneho pasma“ wokoło Drježdźan profituja samo hač do Biskopic a Budyšina, dokelž je tam potrjeba za fachowcami wulka. Tež wobchadne zwiski su dobre. Při kwoće 11,6 pak bjezdźěłnosć w Zhorjelskej kónčinje porno tomu wjele pomałšo woteběra.
Tuchwilu je we wuchodnej Sakskej 19 300 žonow a muži jako bjezdźěłni přizjewjenych. To je 784 mjenje hač před měsacom a 1 551 mjenje hač před lětom. Přičina tohole wuwića je po měnjenju Thomasa Berndta typiske nalětnje wožiwjenje, hačrunjež zyma scyła tak kruta njebě. Nimo toho su po jeho měnjenju twarske firmy nawuknyli, zo je lěpje, sobudźěłaćerjow tež w zymje zdźeržeć. „W twarskej branši mjeztym płaći: štóž je jónu pušćeny, je preč“, rjekny Berndt.
