Dźeń a wjetše poćežowanja brunicoweje jamy dla
Trjebin (AK/SN). Zakładne zrěčenje mjez gmejnu Trjebin a energijowym koncernom LEAG je w dalokej měrje wotzamknjene. To podšmórny Trjebinski wjesnjanosta Waldemar Locke (CDU) na wčerawšim posedźenju gmejnskeje rady. „Jenož mało dypkow dyrbja hač do kónca junija hišće zrjadować. Nazymu móhli jón podpisać“, rjekny wjesnjanosta. Raznje wón kritizowaše, zo běchu so njezjawne informacije ze zrěčenja do medijow dóstali.
Tohorunja nazymu chce sakski ministerski prezident Michael Kretschmer (CDU) do Trjebinskeje a Slepjanskeje gmejny přijěć. Potom přewjedu zhromadne posedźenje wobeju gmejnskeju radow, na kotrymž ma so Kretschmer wobdźělić. Tam narěča potom prašenja, kotrež dyrbja nuznje rozrisać. Mjez druhim póńdźe wo to, kak hladać zelene pasmo, škitace před haru a prochom z brunicoweje jamy.