Strowotniski zarjad ma kwalitu wody w jězorach za jara dobru
Kulow/Budyšin (SN/mwe). Jónu wob měsac přijědu přistajeni zamołwiteho labora w nadawku Budyskeho strowotniskeho zarjada a hygieny do Kulowskeje lěsneje kupjele, zo bychu tam probu wody wzali, z basenka a pitnu wodu ze syće. Prjedy hač je so lětuša kupanska sezona na tymle přewšo krasnym a w Serbach woblubowanym arealu 26. meje zahajiła, běchu tam fachowcy tydźeń do toho wodu jara dokładnje přepruwowali. Ale žane strašne bakterije našli njejsu. Na kwalitu wody dźě wosebje wjelelětny a nazhonity płuwanski mišter Uwe Kickel hlada. Tak do bližacych so njewjedrow přitok wody z Dubrjenskeho bahna zawěra, zo njeby so mazana woda do kupjele dóstała.